రైతు హాలిడే

రైతు హాలిడే

 

పొలంతో

వేసవి

ఎడబాటు కాలాన్ని

ఆశల కొడవళ్ళతో కోసేసి

ఋతు రాగాలను ఆలపిస్తూ

బీడు భూమిలో

నెర్రె లిచ్చిన నేలపై పడుకొని

వేల కళ్ళ ఆకాశంవైపు

వేయి కళ్ళతో

ఎదురు  చూస్తున్న కర్షక జీవికి 

మేఘాలు

వురితాళ్ళను పేనుతున్న శబ్దం

ఉరుములై గర్జిస్తుంటే

అన్నదాత కనురెప్పలు

ప్రమాద సూచికలై

రెప రెప లాడుతో

వర్షిస్తున్న కళ్ళను

ఓదారుస్తున్న దృశ్యం

మెరుపులా ఆవిష్కరిన్చబడుతోంది

గగన కాన్వాసుపై

రాలిన     చినుకు

మరుజన్మ రైతన్న

కంటిలో అన్నట్లు

జలజల  రాలిన కన్నీరు

ఎడమ భుజంపై కండువాని తడిపేసి

ఈ కాసేపన్నా చల్లంగుండు బాబాయి

అని దీవిన్చినట్లుంది

కండువా కుడి భుజంపైకి మార్చుకొని

తడబడుతున్న అడుగులతో

తను బలం పెట్టి పోషించిన

నేలతల్లిని తాకి

'ఋణం తీర్చుకోలేనమ్మా '

అంటూ ఇంటి ముఖం పట్టాడు

కడుపులో ఎలుకలు పరుగెడ్తుంటే

తను నడుస్తున్నాడు

ఏసీ రూముల్లో వారి

బొజ్జలు నింపిన తన రెక్కలని

ఎండిన డొక్కలు ఎక్కిరిస్తుండగా

 అమ్మాయి పెళ్లి ,అబ్బాయి చదువు ,అప్పులు

నకిలీ విత్తనాలు ,కరెంటు  కోత,ఎండిన కాలవ

గుర్తోస్తుండగా నడుస్తూనే వున్నాడు

 పంట విరామం  అని తెల్సుకొని

విస్తుపోయి

పురుగు మందు కొట్టిన చేతులతో

పుడమి తల్లి చేదు మందు

తను తాగేసాడు

అది నకిలీదని, ప్రాణం పోదని తెల్సుకొని

 తడిసిన కండువా

మెడలో బిగించి

పశువుల కొట్టంలో

రాజకీయ బలిపశువు

అయ్యాడు

క్రాప్ హాలిడే కాదు

హాఫ్ హాలిడే కాదు

ఫుల్ శలవు ప్రకటించాడు

వికటించిన బ్రతుకు బండి ఈడ్చలేక

మరో కష్టజీవి

మరో  బడుగు

మరో ప్రపంచంలోకి

తడిసిన కండువా తో.

 

డా.రమణ యశస్వి